مرحبا أختي أناراح اجاوبك بتجربتي :
الرياضيات :
كل اللي درستيه في السنة 2 راح تلقيه في السنة 3 :النهايات..الدوال (cos ,sin ) ..المتتاليات ...لذلك راح تحتاجي دفتر السنة 2 حتى تراجعي منه بعض الأمور اللي ماراحش الأستاذ يرجعلها على أساس أنك درستيها ونصيحتي أكثري من التمارين ..التمارين التمارين التمارين ...لا تعتنمدي على ما يعطي في القسم ولا واجبات الأستاذ ..اعتمدي على نفسك 100/90 مجهود التلميذ و100/10 مجهود الأستاذ
العلوم الطبيعية :
من السنة الثانية راح تحتاجي درس ال ADN والسلسلة والقواعد الآزويتة شيء غير هذا ماراح تحتاجي كل شيء جديد في السنة 3 ....الحقيقة الفصل الأول أسهل فصل ومن بعدها ..راح تتطرقو للنقل العصبي هذا تانيك حاولي تلقي عليه نظرة من مصنف السنة الثانية ............وحاولي تحلي أكبر قدر من التمارين
الفصل الثالث لازمله تركيز كبـــــــــــــــــــــــــــــــــــــــــــــــــــير لكن ماتخافيش شوية تركيز مع مجموعة كافية من التمارين راح تقدري تتمكني منه
آه اختي شوفي في العلوم اهتمي بالروسومات الروسومات الروسومات ...وكذلك حاولي تحتفظي بالصور المجهرية للبنيات الموجودة في الكتاب في ذهنك ...شوفي في امتحان البكالوريا أغلب النقاط راح تا خذها الروسومات ...واحفظي المخططات الوظيفية
وكذلك التمارين التمارين التمارين التمارين التمارين ..................
الفيزياء :
رايحة تحتاجي جدول التفاعل والمعادلات (أنا مانقدرش نعطيك معلومات كافية عن الفيزياء لأني كنت نكرها وماكنتش نهتم بها )لكن ماراحش تحتاجي الكثير من السنة الثانية حاولي تراجعي المادة وتحولاتها (الكيمياء )والميكانيك والباقي راح يكون جديد عليكم
في الفيزياء راح تحتاجي حفظ القوانين وطريقة البرهنة عليها وراح تلقي تناسق كبير بين الرياضيات والفيزياء وبدون بعض الدروس في الرياضيات مارحش تفهمو طرق في الفيزياء لكن ماتخافيش أظن أن الاساتذة راهم عارفين وراح يحاولو ينسقولكم هذا الشيء
الفيزياء هي تمارين تمارين تمارين تمارين تمارين تمارين تمارين تمارين تمارين ...حتى وان مافهمتيش ابحثي عن الحوليات (les annals ) وشوفي التمرين وشوفي الحل نتاعه واستوعبي طريقة الحل ...وراح تلقي نفس التمارين اللي في الكتاب هي نفسها اللي في الحوليات هي نفسها اللي في الإختبارات وهي نفسها اللي في الباك إلا أن المعطيات تتغير وتسلسل الأسئلة ماراحش تلقي حاجة جديدة عليك وهذا هو الجميل في الفيزياء
بالنسبة للمواد الأخرى :الفرنسية والإنجليزية ...الفرنسية ماعلاباليش والله مانقدر ننصحك حوسي على السيجيات نتاع التارمنال وحليهم باش تعرفي طريقة الأسئلة مارايحينش تدرسو قواعد بصح ممكن يطيحلكم على أساس مكتسابات قبلية الأنجليزية راح تدرسي قواعد كثيرة لكن سهلة ماراحش تواجهي مشاكل
الشرعية والتاريخ والجغرافيا راكي عارفة الحفظ يسلكك برك ...لكن هناك نقطة في التاريخ والجغرافيا ...راح تلقي أسئلة عن تعريف مصطلحات وشخصيات ...المصطلحات حاجة باينة اشرحي على حسب فهمك وما تكثريش الشرح اكتفي بسطر أو سطرين قدمي المفيد ...الشخصيات (لاداعي لكتابة ميلاده أو وفاته ان لم تكوني متأكدة ولا زواجه ولا طلاقه هههههههههه راني نضحك برك في الشخصيات عندك :جنسيته (أمريكي .سوفياتي .....الخ )-نشاطه (سياسي .عسكري ...رئيس أي شيئ )-اهم انجازاته خذي هاته العناصر واكتبي بها سطر أو سطرين مفيدين وراح تاخذي العلامة الكاملة ان شاء الله لاداعي للإطالة في الإجتماعيات نعودو للشرعية ...حاولي تحفظي أكبر قدر من الشواهد (الآيات والأحاديث )حتى مايكونش الجواب نتاعك جاف
الفلسفة (هبلتني ربحت الباك وأنا لحد الآن مارانيش فاهمها *غاديين تدرسو طرق لكتابة المقالات وطريقة تحليل نص حاولي تستوعبيهم .....وكذلك احفظي أكبر عدد ممكن من أقوال الفلاسفة هذا شيء مهم أو بالأحرى الأهم ...وكي رايحة تقريها رايحة تفهمي كل شيء
الأدب العربي ؟ رايحين تتطرقو لبعض القواعد ...وماكانش كتابة نص أو تعبير رايحة تلقي تلخيص النص ....شيء أكيد راح تلقي أسئلة الصور البيانية والمحسنت البديعية والاعراب ...بعضها راح تراجعوها (الاستعارة الجاز تشبيه )والآخر راح يكون من مكتسباتكم القبلية
في الباك رايحين يعطوكم نصين اختياريين (شعر ونثر )أنا اللي كان يساعدني هو الشعر وانت خيري الشيء اللي تلقي روحك مليحة فيه
نصائح أخرى :
-ما تراجعيش المواد على أساس المعاملات تقولي نراجع العلوم لاخاطرش 6 ونخلي الفلسفة 2 لا جامي اديري هاكة كل مادة واعطيها حقها ..لأني أعرف تلاميذ كانو يا خذو 15 و16 حتى 18 في المواد العلمية لكن لإهمالهم المواد الأدبية خسرو ...كل مادة وحقها انسي فكرة المعاملات
-التمارين التمارين التمارين نأكدلك على التمارين في المواد العلمية التمارين هي طريقك للنجاح بدون تمارين مانقولكش تخسري بصح وكأنك ماعملتي شيء ما تعتامديش على الأستاذ
-تجنبي الضغط النفسي ...أثناء الإمتحان وعلى طول العام ....الباك هو امتحان لما درسته وماراحش تلقي شيء جديد عليك غير اللي تدرسيه راح تلقيه إلا أنه وطني واللي راح يصححلك مشي اللي يدرسك وخلاص والباك ماراهش نهاية العالم ابذلي مجهود وادرسي وكل شيء على ربي والدنيا مكاتيب الا أن المجهود شرط
-في بالك ديما ديري روحك رابحة الباك وكونك متفاءلة مشي لحد الغرور وانما للتحفيز
-في الاختبارات الفصلية اعتبري نفسك في الإمتحان الحقيقي حتى تتعودي على الجو وتتخلصي من الضغط وتتعرفي كيف تقسمي وقت الإجابة نعم خاصة وقت الإجابة تعرفي منين تبدي وأي جزء هذا مهم
-أنا ماننصحكش بطريقة المراجعة الجماعية خاصة للبنات تحبو تدرسو حتى تلقو أنفسكم تتحدثو عن المسلسلات والممثلين مانقولكش تجنبيه ولكن قلي منه ومن الأحسن عندي تتجنبيه فقط للاسئلةلأنه يضر اكثر مما يفد ومضيعة للوقت حتى احنا الأولاد كنا نهدرو على البالون وعلى الإكيب ناسيونال
-ما تضغطيش على نفسك واعطي لنفسك فرص للراحة خصي وقت للتلفاز للنت مشي كل وقتك ولكن جزء قليل للترويح عن نفسك ....وكي تتقلي حبسي المراجعة والحفظ حتى تريحي وارجعي لأنك مراحش تستفادي شيء ....مراجعة الليل الطويلة قلي منها واعتمدي أكثر على الصباح الباكر ..وقت السحر أنسب وقت للمراجعة (لاننا علميون رانا عارفين باللي الغدة النخامية تتنشط في الصباح وتفقد نشاطها في الليل ابتداء من 10 ليلا لذلك خلي الليل لاسترجاع الطاقة )
--أكثر شيء نوصيك عليه هو العامل الديني شوفي : صلي تصدقي (ولو بكلمة طيبة ولاو بابتسامة )وطالبي بدعو الخير من كل انسان تعرفيه والديك خاوتك جيرانكم أقاربكم أساتذتك حتى أصدقاء النت ...أنا ربحت غير بدعوة الخير ..هذو الأعضاء نتاع المنتدى صحيح مانعرفهمش في الحقيقة بصح والله غير كنت نحسهم معايا ديما كنت ديما نوصيهم يدعولي أظن بل أنا متاكد بفضل دعواتهم ربحت الباك لذلك أن نعاود نشكرهم ....كيما قتلك العامل الديني وكثري من الدعاء الدعاء الدعاء الدعاء الدعاء الدعاء الدعاء الدعاء الدعاء الدعاء الدعاء الدعاء
الدعاء الدعاء الدعاء الدعاء
......................................................................
في الأخير نتمنالك النجاح راني حاس بيكم كامل نتوما نتاوع الباك ان شاء الله تربحو وربي ما يخيبش عبده اللي يعمل وراكم رابحين وان شاء الله اللي قلته يفيدكم هو صحيح غير كافي لكن صدقيني أنا كتبته من قلبي وأي شيء آخر تحتاجوه راني هنا اذا كنت عارف ماراحش نبخل عليكم ....ما تسقسونيش على حاجة برك (الفيزياء واذا ميساء قرات الرد راح تضحك هههههههههههههههههههههههههههه(
نتمنالكم النجاح تحياتي
الرئيسية
موضوع: اريد رايكم ونصيحتكم بليبز 
